|
تنتوش انهرده تنتوش عادي جدا واحد كل همه من
البيت للشغل و العكس مش بيعمل اي حاجه في
حياته الا كده .
في يوم كان يوم رأس السنه الميلاديه كان اليوم
ده مليان في الشغل فاتاخر ( تقفيل السنه و
كده )
المهم خلص شغله و جري علي الموقف علشان يركب و
يروح لبيته
ركب الميكروباص و كان مكانه في الكرسي اللي
وري الميكروباص و بعد ما الميكروباص اتحرك بص
في الساعه لقيها خلاص قربت علي 12 يعني خلاص
كل سنه و انتوا طيبين السنه الجديده حتبتدي
" كل سنه و انتوا طيبين " من غير شعور طلعت من
بقه الجمله دي ( للاسف ميعرفش ايه اللي جاي
وري و لو يعرف مكانش قالها )
سكون غريب بعد اللي قاله و كانه مافيش حد
معاه في الميكروباص و بيكلم نفسه
استغرب ده بيهنيهم علي السنه الجديده
و فجأه طلع صوت مليان ضحكه كلها مراره " سنه
جديده يا راجل و انت طيب يا طيب"
" انت تعرف سنه جديده دي اللي انتوا بتقولها
تقولها لمين " الراجل اللي جمبه
الميكروباص في الوقت ده كان بيمر من علي
الكورنيش . فشاور الراجل لمركب راكنه و كلها
انوار و ناس باين عليها خربانه من اللي بتشربه
.
شاور الراجل و قال " يا طيب انت تقول للناس دي
كل سنه و انتوا طيبين مش احنا "
" و ايه المشكله اني اقول يعني مش دول زينا "
تنتوش و هوا مستغرب من الرد
"لا يا طيب ول ناس ولاد ناس دول منهم اللي
قريب البيه فلان و الباشا علان و لكن احنا يا
طيب من عامه الشعب يعني احنا اولاد ...."
" ليه يعني " تنتوش
" ايه يا عم انت ايه اللي بتعملوا في حياتك .
مش انت زينا ولا ايه ؟" الراجل
" زيكم ازاي انتوا مين " تنتوش
" زينا احنا اللي مطحونين . الصبح متبهدلين في
الشغل و طالعه عينينا و عينين اللي جابونا
علشان كام ملطوش مش بيكفوا . و بعد كده يدوب
نروح نريح الجته علشان نروح جري علي شغل بليل
اللي اهه بنحاول بيه اننا نأكل العيال عيش و
معاه شويه طبيخ و ممكن يعني لو مره كده يكون
في حته لحمه يكون يوم عيد "
الراجل اللي جمب تنتوش قال الكلام ده و تنتوش
حس بعدها انه بجد عمره ما فرك في الحاجات دي .
لان تنتوش عمره ما فكر في حاجاه كل اللي هوا
فيه انه يشتغل و بس و الباقي علي المدام و
الاولاد .
" بس يا استاذ يعني برضه ممكن نفرح " تنتوش
" يا طيب احنا مش ممكن نفرح احنا يا راجل يا
طيب اللي بنعيشه احنا مش عيشه حتفرق ايه اننا
في 2006 ولا في 2007 او حتي 2010 زي ما هيه
الماهيه قليله مش مكفيه و همنا زي ما هوا
بالعكس الاولاد بيكبروا و همهم بيزيد اللي
عاوز يدخل جامعه و اللي عاوزه تتجوز . و كمان
فوق دول و دول الدوله ربنا يخليها لينا كل سنه
بتغلي الاسعار ولا انت مش عايش معانا "
" اه انا عارف " تنتوش
" اينعم الحكومه الجميله بتزودنا في المهيه بس
بتزود معاها الاسعار اكتر من 120% يا طيب "
الميكروباص خلاص وصل للمكان اللي بينزل فيه
تنتوش
تنتوش و هوا في طريقه للبيت كان كلام الراجل
اللي جمبه بيرن في دماغه
" هوا اللي كان بيقولوا صح بس انا عايش "
" عايش ايه يا عم هوا انا اخر مره خرجت مع
مراتي زي ما بشوف في التلفزيون كان امتي
ياااااااا ه ده من يوم ما اتخطبنا يعني يجي
كده من 5 سنين او اكتر و من يوم ما اتجوزنا و
انا في الشغل و هي في البيت "
طلع تنتوش و لقي مراته زي كل يوم مستنياه
" كل سنه و انتي طيبه" قالها تنتوش يمكن ينسي
كلام الراجل اللي جمبه
و فجأه طلع صوت مراته مليان ضحكه كلها مراره "
سنه جديده يا راجل و انت طيب يا طيب"
" انت تعرف سنه جديده دي اللي انت بتقولها
تقولها لمين " |
