|
تنتوش انهرده تنتوش في ربيع
العمر . تنتوشنا المنشود تنتوش عاش و اتعلم و
اتخرج و اتمردغ في تراب الميري الحكومي .
تنتوشنا عاش ايام عز مصر ايام
الطبيخ المليان لحمه. و العيش اللي يستاهل
يتاكل حاف. عاش ايام الموصلات الفاضيه و اللي
ليها تسعيره واحده . اتجوز ايام الشقق اللي
كانت ماليه الاماكن .
تنتوشنا انهرده معدي الستين و
داخل علي السبعين " ربنا يديله طوله العمر " و
من يوم ما اطبق عليه قرار الاحاله علي المعاش
و بعد كده وفاه زوجته مفرقش بيته . قاعد فيه
ليل نهار . و من كل وقت و التاني يزوره حد من
اولاده و بناته اللي اتجوزوا و عايشين في
بيوتهم .
ويوم تيجي بنته تطبخله و يوم
تاني يجي ابنه علشان يجيبله المعاش و يقضيله
طلباته .
المهم علشان شكلي كده طولت
انهرده في وصف تنتوشنا بس كان لازم ( اعزروني
) .
في يوم كان تنتوش ( غلطه و
الله ) بيتفرج علي التلفزيون المصري المعجزه
صاحب احلي برامج لقي خطاب لراجل مهم شافوا قبل
كده ( باين وزير او رئيس الوزراء حاجه كده) و
اصل نتوشنا من صغره ملهوش في اي شئ اسمه
سياسه.
المهم قعد يتفرج عليه ( مرغم و
الله اصل كل القنوات كانت بتعرضه ) سمع كلام
كتير و ارقام و دلائل و حوارات قالها الراجل
المهم ( اللي اكتشف انه رئيس الوزراء ) ارقام
تدل علي ارتفاع اقتصاد البلد و دلائل علي تحسن
التعليم و.و.و
- ياااااااه هو صحيح كلام
الراجل ده . امال ايه حكايه الاولاد ولادي
اللي بيقولوا اصل يا بابا الموصلات . اصل يا
بابا التعليم . اصل . اصل . هما بيضحكوا عليا
و لا انا علشان مش بنزل من البيت فمش عارف .
تنتوش حس انه انقطع عن العالم
و حس انه مش عايش و دافن نفسه بين اربع حيطان
.
قرر ( يا ريته ما قرر ) انه
ينزل و يستمتع بالعز اللي قاله الراجل المهم (
احنا قولنا قبل كده انه اكتشف انه رئيس
الوزراء ) - اصل تنتوش طيب و بيصدق اي كلام
بيتقال له -
لبس تنتوش و علي الشارع .
اول حاجه جات علي باله انه
يعدي علي المدرسه اللي في اخر شارع بيته علشان
زي ما قال الراجل المهم تحسين التعليم. قال
يعدي و يمتع نظره و يسرتجع ذكريات الماضي و
التعليم .
اول حاجه وقع عليه نظره منظر
التلاميذ و كل واحد شايل داهيه عي كتفه تهد
جبل . و ما شاء الله كلهم واقفين بره المدرسه
( مع انه وقت الدراسه يعني ولا فسحه ولا اليوم
الدراسي خلص ) اللي بيلعب كوره و اللي قاعد
علي الرصيف و اشكالهم تشرح القلب .
و علشان نتنوش زي ما قلنا طيب
و بيصدق قال لنفسه
- يا عم دي مدرسه و اكيد في
كتير غيرها و هي اللي بيتكلم عليها الراجل
المهم . يعني مدرسه واحده مش مشكله و مش منها
ممكن نحكم علي كلام الراجل
قرر تنتوش انه يتمشي شويه . و
هو ماشي لقي قهوه قال لنفسه
- يااااااه الواحد ليه كتير
مقعدش علي قهوه
راح قاعد و طلب كوبايه شاي و
بنظره سريعه لاحظ ان معظم اللي قاعدين شباب
- هما مش وراهم شغل ولا ايه
قال تنتوش لنفسه .
و سمع كلام كتير زي واحد بيقول
للتاني
- انا و الله حاسس اني حتحال
علي المعاش و انا لسه مشتغلتش
و تاني بيقول لتالت
- هو احنا ممكن نلاقي شقه
تلمني انا و خطيبتي الي خاطبها ليا 8 سنين و
تكون اجار قديم و مرتبي يكفي ؟؟
و رابع بيقول لخامس
- يا ابني دلوقتي 19 سنه و
شايلين الهم احنا عندنا 29 يعني نموت احسن
استغرب تنتوش من الكلام بس زي
ما قلنا انه طيب و بيصدق الكلام قال
- اكيد شباب فاشل معندهوش طموح
و مش منهم حنحكم علي كلام الراجل
حاسب تنتوش علي الشاي و لاحظ
ان الشاي الي كان 25 قرش في اماكن انضف من
اللي كان قاعد فيها لقي بجنيه و نص
- استغلال قالها تنتوش و
مشي في الشارع
قال لنفسه الواحد بدل ما هو في
الشارع يروح يزور ابنه اه هو ساكن بعيد بس مش
مشكله اركب مواصله و استمتع بشوارع القاهره .
وصل للموقف بتاع الميكروباص .
- ياااااااه كل دول ناس مستنيه
المواصلات هي ايه الحكايه؟ قالها تنتوش بعد
ما شاف البشر اللي واقفه مستنيه
برضه علشان ميكدبش الراجل قال
لنفسه اصل القاهره زحمه و ربنا يكون في عون
المواصلات .
وقف تنتوش فتره ميعرفش قد ايه
بس كل اللي كان بيسمعه
- هي المواصلات مش حتفضي
- شكلنا حنبات في الشارع
كلام كتير و كل واحد من الناس
اللي مستنين بيطلع همه في الكلام.
و فجأه وصل الميكروباص و مره
واحده منغير اي مقدمات هجوم و ناس بتجري و ناس
بتقع و تنداس و ناس تزعق و ناس تهلل و تنتوش (
يا حول الله ) لقي نفسه بالدفع الجبري جوا
الميكروباص و اربعه خمسه اللي قاعد علي رجله و
اللي ساند علي كتفه و اللي شويه و يقعد فوق
راسه.
بعد فتره من الوقت ابتدت
الزحمه تهدي و حس تنتوش انه بني ادم قاعد في
ميكروباص و قبل ما الميكوباص ما يتحرك لف
السائق وشه للركاب و قال
- الاجره جنيه و نص و اخرنا
ملف الجامعه
و هنا انقلبت الدنيا .
- ايه الظلم ده. - يا
مفتري حرام عليك
و اصوات تتعالي و تنتوش قاعد
مستغرب المنظر الغريب فميل علي جاره و قال
- هي الاجره كام ؟ رد
جاره - الاجره يا حج جنيه و المفتري عاوز
يغليها و علي اقل من نص المسافه.
و هنا تردد صوت الراجل المهم
علي ودنه و هو بيتكلم علي الرخاء القادم و
معاه صوت الناس اللي شغاله تهلل و صوت السائق
و هو بيقول - اللي مش عاجبه ينزل بلاش قلبه
دماغ علي الصبح.
دون شعور نط تنتوش من مكانه و
جري علي البيت و اول حاجه عملها كسر التلفزيون
و الرايو لميت حته و دخل اوضه نومه و قفل
الباب
من يومها ( يا عيني عليك يا
تنتوش ) و هو في اوضه نومه و كل ما يشوف او
يسمع صوت رايو او تلفزيون يقعد يصرخ و يطنطط
مكنش يومك يا تنتوش
|
