|
تنتوش انهرده مالوش في اي شئ
ولا اي حاجه.
بيصحي الصبح( قصدي مع اذان
العصر) لغايه لما ينام قبل الفجر بقليل او
بعده مافيش في دماغه غير ازاي يقضي وقته و ده
من يوم ما تخرج من المعهد لغايه دلوقتي .
أما علي كافيتيريا أو نادي او
علي النت و في اوقات فارغه قدام التلفزيون
بيتفرج علي الدش اللي جابهوله السيد الوالد
بالقسط علشان ابنه العزيز .
تنتوش في يوك كده ملقيش حاجه
يعملها علشان الشله كلهم كل واحد ابوه قافش
عليه علشان الامتحانات .
فقرر قرار حكيم روش انه يقضي
اليوم في البيت بيتفرج علي الدش و يقلب في
قنواته الكتـــــــــير.
قعد يقلب لغايه لما لقي قناه
اغني متخصصه قال لنفسه
- الواحد يشوفله كلبين لغايه
لما الفيلم يبتدي
بعد فتره مش طويله ابتدت اغنيه
اسمها -145 جنيه- شد الاسم انتباه تنتوش و
انتبه للاغنيه و كلامها - و ياريته ما عمل
كده-
كلام الاغنيه الي بيغنيها شاب
بتتكلم عن موظف في الحكومه و بياخد 145 جنيه
في الشهر و باسلوب ساخر قلب الشاعر الواقع الي
النقيض حسسك ان 145 ممكن تعمل كتير .
بعد انتهاء الاغنيه انتبه
تنتوش لحاجه
- يعني انا لو اشتغلت في
الحكومه اللي انا مستنيها حقبض 145 جنيه في
الشهر. مش ممكن .ده انا ممكن اخلصها في يوم
او يومين .
-لا لا مش ممكن يعني اشتغل شهر
كامل علشان اقبض 145 حنيه طيب اعمل بيهم ايه
انا لو قعدت في البيت و منزلتش حصرفهم علي
النور و المايه والزباله اللي حطينها جديد علي
الفاتوره.
-145 جنيه ده كده انا مش ممكن
اتجوز يعني حصرف علي المدام من فين. ده
لواساسا عرفت اتجوز و اجيب شبكه و مهر.
-145 جنيه ده الواحد لو اشتغل
لازم يرتشي و يبقي مرتشي علشان يعيش.
-يرتشي ويبقي مرتشي.طبعا انا
مليش ظهر يعني حتمسك اتحبس ويتكتب عني في
الجرايد الفاسد اللي فيه و فيه وتبقي فضيحه
ونكبه عليا و علي العيله والناس تتبري مني .
قام تنتوش و لبس اي حاجه و
مظربش شعره جل زي المعتاد و مظبطش نفسه في
المرايه ولا اي حاجه من حورات الروشنه اليوميه
المعتاده.
ونزل جري و قعد يمتمشي في
الشوارع و 145جنيه و الاغنيه بتاعتها بتتردد
في ودانه و هو ماشي لقي ناس كتير .
اللي شايل يافطه مكتوب عليها (
يسقط الفساد) و تانيه ( كفايه ظلم ) و تالته (
نريد عمل ).
و ناس تانيه بتهتف و ناس بتزعق
.
و كل دول حواليهم دايره سوده
كبيره اكتشف انها امن محاوط الناس دول و
عربيات بوكس واقفه و عربيات كبييره مليانه
السود اللي محاوط الناس دول .
تنتوش من غير شعور دخل وسط
الناس دول و قعد يزعق
-تسقط ال145 جنيه.............
تسقط ال145 جنيه
و مره واحده و من غير اي
مقدمات حس بحركه غريبه في الدايره السوده اللي
من بره حركه سريعه منظمه و حس ان هو و الناس
بيتحاوطوا
-تسقط
ال145 جنيه.........تسقط ال145 جنيه
لسه تنتوش بيهتف و الدايره
بتضيق عليهم
-تسقط ال145 جنيه.......تسقط
ال145 جنيه
تنتوش يهتف و الدايره تضيق
..... يهتف ة تضيق و ......
-لغايه دلوقتي تنتوش مفقود و
السيد الوالد (ربنا معاه ) بيلف علي الاقسام و
المستشفيات و لكن مافيش تنتوش
|
