|
تنتوش شاب مصري زي اي شاب عاني
و بيعاني و لسه كمان حيعاني من كل الي بيشوفه
و بيسمعه و بيعيش فيه في ظل او بالادق في ظلمه
الحكم اللذيذ الي احنا فيه
تنتوش انهرده في وسط البلد الي
طبعا فاضي جدا ( مش تريقه و الله ) الاخوه
اصحاب البدل السوداء بتاعت الشتاء اكتر من
البشر ( اصل مدير الامن الجديد شادد حيله )
المهم قال تنتوش لنفسه : ياد يا تنتوش انت لسه
قابض يلا نقضيها تاكسي بدل الشحططه في
الموصلات الي لو لقيت واحده تبقي امك دعيالك
في ليله القدر و لو لقيت يبقي باذنه حيحصلك زي
الي حصل في وسط البلد يوم العيد و ربنا حليم
ستار
المهم تنتوش ركب تاكسي و قاله
الجيزه يا اسطي
سواق التاكسي اعوذ بالله مكشر
تكشيره وحشه قوي يا دوب بس ساله تنتوش ايه
مالك و زي ما تقولوا شد فتي القنبله الي جواه
علي طول راح انفجر
يرضي مين يا استاذ الزحمه الي
احنا فيها دي
تنتوش : يا اسطي هي امتي كانت
سالكه
السواق : لا يا بيه مش زي كده
تنتوش : ليه يا اسطي كل يوم
زي التاني
السواق : لا يا بيه دي ليها 12
او 13 يوم الشوارع يا دوب ماشيه طيب اسمع دي
يا استاذ تصدق اني من نادي السكه لغايه ستي
ستارز اخد ساعتين الا ربع ( الطبيعي تكون
بالكتير نص ساعه )
تنتوش : ليه يعني
السواق : يا باشا العربيات يا
دوب تتحرك عجله و تقف نص ساعه
طيب سيبك من مدينه نصر عارف
المحور
تنتوش : اه
السواق : قول كده تلاته كيلو
من ميدان لبنان لغايه كوبري 15 مايو و كمان
ممكن لغايه نزله التحرير و العربيات واقفه
تخيل يا بيه دي الناس بطلت العربيات و نزلت في
الشارع
تنتوش : طيب ليه كده يا اسطي
السواق: و الله يا بيه مش عارف
بس و الله انا حاسس انها عمايل الحكومه
تنتوش : اشمعني يعني
السواق : اه يا بيه تلاقي
الحكومه مش عاوزه حد ينطق معاها فقالت اهد
البشر في الطريق من الشغل للبيت علشان يرجعوا
البيت طالع عينهم و يتخمدوا من غير ما حد يفتح
صوته حركات حكومه يا بيه ربنا ما يوريك
تنتوش : يعني هي الحكومه موقفه
الشوارع بس دي موقفه حال الناس كلها
السواق : علي رايك يا استاذ
و سكت تنتوش و السواق و قعدوا
يتفرجوا علي الطريق الي طبعا كان واقف وقفه
سودا
و بعد اكتر من ساعه و نص في
الطريق تنتوش وصل سالم للبيت بس مكانش بيشكي
الا من صداع و مغص و كرشه نفس بس ( طبيعي بعد
مشوار ميخدش نص ساعه ساعه الا ربع و سيادته
خده في ساعه و نص او اكتر ) اترمي علي سريره و
اتخمد زي ما بتقول الحكومه
دي اول تنتوشه
من تناتيش تنتوش اشوفكم في تنتوشه تاني
|
