|
تنتوشنا انهرده تنتوش عايش حياته تحت الحيطه
كل حياته ماشيه جمب الحيطه
الصبح في شغله و همه و بالليل يأما في البيت
بيحاول يلم مصاريف بيته و يحسب معادله
اللوغاريتم بتاعت كل شهر " كام في الشهر و
ابتدي استلف و ادور علي معونه "
حياته كلها كده . حياه روتينيه.
الاسعار غليت . و الموصلات اسعارها كل يوم فوق
و ياريت تقدر تلاقي مكان في ميكروباص تكون فيه
بني ادم . ولا الشغل يعني يكون شاب اطحن في
التعليم المصري العظيم و بعد كده يقعد جمب امه
لا شغله ولا مشغله.
ولا السكن يا سلام يأما تتبعت اخر ارض الله في
شقه تلمك انت و مراتك يأما تقعد مع الست
الوالده و تبتدي الحرب البارده بين مراته و
امه
" مش ممكن تكون حياتنا كده . اكيد في حل "
تنتوش قعد يفكر و يدور علي حل . قعد يتمشي في
شوارع المحروسه لغايه لما حس ان رجليه خلاص و
الجزمه اللي اشتراها في التخفيضات من اربع
سنين حتتحال علي المعاش قبل ميعادها .
قرر قرار حكيم انه يقعد علي قهوه كان بيقعد
عليها زمان ايام الكليه و قبل الجواز . كانت
بتقعد عليها اصحاب الافكار السياسيه و الحركات
النحريريه و الناس من النوع ده .
اول ما وصل بص بصه سريعه فاحصه ماحصه للوشوش
الموجوده علي القهوه .
وشوش بسم الله ما شاء الله كلهم كده اول ما
تشوفهم تقول هم الدنيا اتشال و اتحط عليهم .
فجأه لاحظ ان في شكل من الاشكال الموجوده من
الاشكال اللي كانت صاحبه طريق طويل في الشارع
السياسي ايام الجامعه.
راح علي طول علي الطربيزه اللي قاعد عليها
بعد السلامات المعتاده و السؤال عن الحال و
التذكير ببعض المواقف في الماضي الاليم .
تنتوش حكي لصاحبه السياسي عم اللي في باله
" طيب انت عاوز ايه ؟" السياسي
" انا قررت اني اشترك في حزب من احزاب
المعارضه علشان يمكن اغير من اللي احنا فيه .
انت رايك ايه يا زعيم الشارع السياسي " تنتوش
ضحك صاحبه السياسي و قاله" زعيم ايه يا عم .
الله يكرمك . و حزب ايه اللي حتشترك فيه ؟"
" مش عارف انت ايه رايك ؟" تنتوش
" و لا انا شوف انت " السياسي
" مش انت لسه في السياسه ؟" تنتوش
" يعني " السياسي
" طيب ماتشوفلي حزب " تنتوش
" حزب . انا اشوفلك حزب هوا انت عاوزني
اشتريلك جزمه " السياسي
" طيب يا عم متزعلش كده . ايه رايك في الوفد؟"
تنتوش
" لا كان زمان . دلوقتي خلاص صلاحيته انتهت
انت لسه فاكره " السياسي
" طيب الغد انا بسمع انه شغال " تنتوش
" كان زمان قبل ما يتحبس رئيسه السابق و
دلوقتي خلاص علي الرف"السياسي
"لا اله الا الله . طيب العمل او الناصري ؟"
تنتوش في نرفزه
" العمل في التلاجه. و الناصري الله يرحمه
جمال عبد الناصر لو شاف اللي بيحصل كان ولع
فيهم " السياسي
" مش ممكن . يعني اعمل ايه؟ انا عاوز اكون في
الشارع يمكن اعمل حاجه " تنتوش
هز صاحبه كتفه و مد شفايفه يعني بيقول مش عارف
" طيب انت بتعمل ايه في حياتك" تنتوش
" ولا حاجه زي ما انت شايف بتفرج علي اللي
رايح و اللي جاي " السياسي
" يعني ايه مافيش حل يعني انت عجباك
العيشه؟"تنتوش
" لا بس أهه بتنضاهر و بنقف نحتج" السياسي
"بس ؟" تنتوش هز السياسي صحبه راسه يعني
ايوه.
تنتوش حس انه جه في مكان غلط و حس انه رمزه
السياسي اللي كان زمان نفسه يكون معاه بقي زي
ما بيقول في التلاجه.
قام و ساب صاحبه السياسي و ساب لرجليه الراحه
في اختيار الطريق . قعد يتمشي في شوراع وسط
البلد لغايه لما وصل للكورنيش و كان علي يمينه
مبني وقف قدام هذا الصرح العظيم -صرح حزب
الحكومه- و شاف عربيات احدث موديل و بدل اخر
شياكه و حاجات عمره ما ممكن يحلم بس انه
لابسها.
و مره واحده قرر قرار تاني ( قرارات تنتوش
العظيمه )
و يلا جري ناحيه الشمال و جري و هوبا
تــــــــــــــــــــــــــــــــــــــشششششششششششششششش
" الحقوا يا ناس في واحد نط في النيل"
الله يرحمه تنتوش راح و نفسه في حزب يلمه
|
