--------------

                                     

وأخيرا جلسنا أنا وهو فقط لأول مرة منذ فترة فكثيراً ما يحيط بنا الأصدقاء وبدأنا نتجاذب أطراف الحديث وتطرقنا إلي موضوعات شتي ثم توقفنا فجأة عن الكلام ونظر كل منا إلي الأخر وكأننا نتحدث سوياً بدون كلام ولمعت عيني كلانا فجأة ثم نطقنا في نفس الوقت تفتكر فيه حل ؟! وساد صمت مرة أخري لبرهة من الوقت وعلي وجهنا ابتسامة غامضة وكأنها جواز مرور لكل منا من الأخر للبدء بالتحدث فأصر في عناد بنظرته أن أبدأ أنا الكلام احتراماً منه كوني امرأة فرضخت لهذا الإصرار بكل كبريا وقلت : * ممكن نفكر براحة وهدوء ونناقش الموضوع ثاني . * أنا عايز أفهم لنفرض أني دلوقتي شاب لسه متخرج وعايز أكون نفسي وأبني مستقبلي وأعمل مشروع أعمل أيه ؟ * أنت بتهذر طبعا عندك الصندوق الاجتماعي للتنمية وقبل أن انهي كلامي .. * أأأأأه وأقدم علي قرض مثلاً 50 ألف جنيه وهدفعهم تقريباً 67 ألف جنيه ده لو مدخلتش السجن قلتله .. * وتبقي أنت المستثمر الصغير في السجن .... ضحك وقال * أيوه ولو مدخلتش السجن أنا إيه اللي يخليني أدفع كل الفلوس دي في المشروع وبعدين يعني المشروع هيكسب كام علشان أشيل منه الالتزامات هيتبقي جزء صغير ده المفروض أنه مرتبي وطبعاً هدفعه فوائد يبقي أنا كسبت إيه ؟ أنا مش عارف ! * عندك حل تاني عشان تعمل مشروعك ؟ طبعاً لأ !! .. وبعدين هو أنا مش المفروض أني عايز أتجوز أجيب شقه وأعمل بيت وبدون أن يكمل كلامه قلتله ... * أنت بجد بتهزر تتجوز وطبعاً هتعمل أسرة وتزود النسل وتزود المشاكل وتزود عدد السكان هي ناقصة يا أخي أنت مش حاسس بالبلد ولأ إيه ؟ وبعدين قدم في مشروع إسكان الشباب هما منزلين إعلان دلوقتي في المدن الجديدة بس يعني هما بس عايزين بس 5 آلاف جنيه مقدم وعند استلام الشقة إن شاء الله يعني (يديك طولة العمر) هتدفع ألفين جنيه ..... * أنا لسه متخرج أجيب 7 آلاف جنيه منين وأنتي عارفه الشغل مرتبه كام يعني احوش منه أزاي ؟ * أنا مالي هما اللي بيقولوا إن الحاجات دي للشباب .. مش عارفه يقصدوا مين بالضبط ؟! * علي فكرة اللي بيحصل ده حرام بجد... أه صح صح مفيش غير الحل ده إحنا نروح ننتحر أحسن ونريح نفسنا ونريحهم منا كل شويه يقولوا عملنا للشباب ... للشباب وإحنا الحمد لله زى ما أنتي شايفه ... إحنا نرمي نفسنا تحت أي عربية ماشية وخلاص ... ونخلص * موافقة بس بقولك إيه أنت تزوقني تحت العربية عشان ما يبقاش انتحار ... * ماشي وأنتي قبل ما تموتي تشدي أيدي تحت العربية ونموت سوا ويبقي كده منتحرناش ... إيه رأيك ؟ وفجأة وبصوت عالي أجش قال الجرسون تشربوا إيه ؟ نظر كل منا إلي الأخر وقلنا في نفس واحد 2 شاي بالنعناع فمشي الجرسون وهو يتمتم بكلمات غريبة أعتقد والله اعلم إنها عبارة عن شتائم .. فتعالت ضحاكاتنا سوياً وانضم إلينا أصدقائنا وهو يسألون في استغراب منهم ماذا يحدث ولماذا يتمتم الجرسون بكلمات غير مفهومه ... هو فيه إيه ؟ ونظر كلانا للأخر نظرة نفهمها نحن فقط وضحكنا مرة أخري وقلنا مفيش إحنا طلبنا 2 شاي بالنعناع ... ولم يفهم أصدقائنا ما نقول وأحسسنا أنهم يتمتمون هم أيضاً بكلام نعتقد أنه غير مفهوم ولكنا لا نريد أن نعرف ماهو !! ..... وتواعدنا أنا وهو بالنظرات علي أن نكمل حديثنا في مرة أخري مع 2 شاي بالنعناع عندما تسنح الظروف ..