موقع دوشة "الشباب الحر .. مش هنسكت"

 

--------------

 

 

  

 

خيـال المآتـة

  

ما أسوأ القاهرة بضجيجها وصخبها وضوضائها ودخانها وكل قرفها من الأخر وعلشان جمالها الأخاذ ده قررت أنى أسيبها كام يوم وأروح البلد طبعاً انتم عارفين أنى من الصعيد سمعاكم بتقولوا حد يروح الصعيد فى الجو ده ؟!! أيوه ده الجو جميل بالنهار وتحفه .

علشان ما اكترش عليكم روحت لخالى وقلت له أنا عايزة اتمشى فى الغيطان – قالى وماله.

نزلت الغيط لقيت من بعيد راجل لابس جلابية وطاقية ، شكلة راجل فعلاً أول ما قربت منه لقيته جسم من القش ولابس جلابية وطاقية .

ضحك خالى وقالى ده خيال مآته بنخوف بيه العصافير .

قلتله أنا افتكرته راجل يا خالى .

ضحك مرة تانية وقالى أقعدى احكيلك حاجة حلوة قوى .

قعدت على الارض فى الغيط وانا مبسوطه قوى من كل الأتموسفير المحيط .

خالى قالى : الحقيقة يا بنت اختى خيال المآته شبه حاجات تانى كتير .

قلتله : زى ايه يا خالى ؟

قال خالى : اول ما اتعمل مشروع توشكى ، مش كل الشباب افتكر انه مشروع العمر بجد .

قلتله : اول ما جيه الدستور يتغير ، مش افتكرنا انه تغير بجد .

قالى : اول ما قالوا فى انتخابات رئيس جمهورية بشكل ديمقراطى ، مش المواطنين افتكروا ان الديمقراطية بجد .

قلتله : اول ما جه يتعدل قانون الصحفيين ، مش كلنا افتكرنا ان حبس الصحفيين هيتلغى بجد .

قالى : اول ما اتعمل مشروع القراءة للجميع ، مش افتكرنا ان كل الناس هتقرأ والبلد هتبقى مثقفة بجد .

قلتله : اول ما قالوا البطالة هتخلص من البلد ، مش اتخيلنا ان احنا هنشتغل والدنيا هتكون فى الحلو والآمال كلها تتحقق بجد .

قالى : اول ما قالوا فيه تكافؤ فرص ومفيش واسطة ولا محسوبية ، مش قولنا فى عقل بالنا يمكن صحيح بجد .

قلتله : اول ما قررت أجى عندكم أريح دماغى شويه ، مش كنت فاكرة أنى هارتاح بجد .

قالى : أظن انك عرفتى أن خيال المآته مش راجل بجد وانه بس بيخوف العصافير

 

 رشا غازى