|
أظن وليس كل الظن أثم أنني علي مقدرة
لا بأس بها لمعرفة كيف يفكر رئيسنا المحبوب
جداً وانطلاقا من المقولة " البينة علي من
ادعى " أقدر أقول لكم سر ، أنا نفسي ما أحبش
افتكره ، وهو إن أنا اتولدت بعد شهر واحد من
تولي رئيسنا " بطل الحرب والسلام – جسر السويس
– ألف مسكن – عرب - جراج " وللعلم الميكروباص
أجرته بقت جنيه بعد رفع اقصد تحريك سعار
البنزين والسولار ، وعلى فكرة (من غير حرب ولا
دياولو ) مرورا بالمثل الشعبي القائل " من
عاشر القوم 40 يوم " حتى نصل إلي بيت الشعر
الرهيب لمحمود سامي البارودى " وما أنا بعلام
الغيوب وإنما أري الرأي ما هو واقع "
أي أنني نشأت ةوترعرت ومررت بفترة
المراهقة والشباب واتعلمت واتخرجت واطبطلت
(جايه من البطاله) وخطبت وهتجوز – نقف هنا
شويه – علشان لو ربنا سلها وخلفت مش هقدر أرفع
عيني في أبني لأننا هنبقي أنا وهو مواليد
(رئيسنا) هذه المأساه اوعدكم لو حدثت هعملها
هرطشه مخصوصه واللي هيمنعها من الحدوث هو
شيئين الأول أني متجوزش والثاي أني ماطلعش
بخلف ..... ماتودوناش في داهيه !!!
يعني كده من الأخر أنا هراش التيته
وأظن أن أي عاقل أو في البلد دي أو حتي ربع
عاقل أو جايبه used استعمال طيب هيبقي هارشها
زي حلاتي .
الناس اللي اضيقت أقوي من تصريح الريس
بتاع " بق الأسد" مش عارف هما اتضايقوا كده
ليه ، المشكلة إن احنا بننسي افتكروا الصورة
بتاعة رئيسنا المحبوب (قوي) والصديق أولمرت
واضعاً يده علي كتف رئيسنا المحبوب (طحن)
والصورة دي بعد أيام من استشهاد عساكرنا على
الحدود وبنيران القوات الاسرائيلية .. بالذمة
يا جدعان الناس دي زعلانه قوي كده ليه ؟؟!!
من غير فتحة صدر .. ولا بقول إن احنا
نروح نحارب ، لأن أنا لا دخلت الجيش (ولا
شوفته فيديو حتي) ثم أني معنديش فيديو ولا ثقه
فى حد ومن الأخر الرجاله ماتوا فى الحرب .
الناس دي كانت زعلانه قوي لأن حتى مصر
المحروسه (من عين البشر واولهم عيوني) حتى
ماخدتش موقف لا زى ولا ابن عم ولا شبه حتى
موقف (شافيز) رئيس فنزويلا ، واتراهن معاكم
على أن في خمسه يعرفوا عاصمة فنزويلا ايه ، مش
فنزويلا فين !!
شافيز سحب سفير فنزويلا في اسرايل
وفنزويلا دوله من دول امريكا الجنوبية يعني
بعيد عننا خالص وملهاش في التيته ولا تربطها
علاقات عناق (من بتوع اسامة سرايا) بلبنان ولا
أي حاجة بس اتأثروا بمذبحة (قانا) الجديدة
فقرروا سحب السفير وللعلم فنزويلا على مرمي
حجر من امريكا ، لكن عندنا هنا رئيسنا المحبوب
(كيك) يصرح انتوا عاوزنى احط ايدى فى بق الأسد
– سلامة ايدك يا ريس (على رأى بلال فضل) مع
أني معرفش ايه علاقة اسرائيل بالأسد غير انهم
ولاد مرات الأسد
أما مذابح غزة forever ومذبحة قانا 1
، 2 ومذابح الجولان retuerns ومذابح (علي
طريقة الافلام الامريكية) القاهرة back &
force إن حدثت واظنها قريبة فسيكون (أظن وليس
كل الظن اثم رد رئيسنا المحبوب لأولمرت حينما
يقابله وعند الاستعداد للصورة التذكارية وعلى
طريقة الافلام العربية سيقول وبالبق المليان "
من فضلك لو سمحت نزل ايدك تحت "
ملحوظة : اللى يعرف عاصمة فنزويلا
يبعتلى علي الايميل
بقلم : مجدي إسماعيل
|
