اهلا بكم :!!!

 

هنتكلم النهارده عن حاجه شيقه جدا ؛ الا وهي اللوكيميا ( سرطان الدم ) - مش قولتلكم اننا هنتكلم عن حاجه شيقه جدا !!.

سرطان الدم ده عباره عن مرض بتسببه كرات الدم البيضا اللي بتتكاثر بشكل غير طبيعي ( بتتجنن ) ؛ وبتهاجم كرات الدم الحمرا وبتسبب حاجتين

الأولى : انها بتعمل نوع من انواع الانيميا الحاده .

التانيه : بتسبب نقص شديد في الصفايح الدمويه؛ وده بيعمل شكل من اشكال عدم تخثر الدم ( تكوين الجلطه ) – يعني المريض يقعد ينزف لحد ما يبانله اصحاب.

طب والعلاج ...... اولا: العلاج الكيماوي وده بيعجل بموت المريض؛ وبيدمره صحيا ومعنويا ؛ والحاجه التانيه هي عمليه زرع النخاع ودي ناهيك عن انها مكلفه جدا فقليلا ما تنجح ..............

اهلا بكم!!! .

ايام الكليه الجميله - رغم انفي - كان عندنا زياره( لمزارع دينا ) ؛ واليوم ده مكنتش نمت كويس ؛ وكنت راجع من هناك( فاصل). واول ما نزلت من اتوبيس الكليه لقيتها قاعده مستنياني بفارغ الصبر؛ واول ما شافتني قالــــت :

• انتا اتاخرت كده ليه ؟
• معلش اصل انا مكنتش اللي سايق !
• يابني اصل انا عندي بحث وكنت عاوزه حد يعملي SEARCH على النت ؛ وكل اما كنت اقول لحد من اصحابي ؛ يقولي حاضر (وينفضلي) ؛ فقلت مفيش غير الواد مجدي هو اللي هيخلصلي الموضوع ده .

قولتلها :

• مفيش مشاكل بس اخرجي بره الكليه وهاتيلي شوية ساندويتشات وكانز؛ عشان انا واقع من الجوع !

كانت اعز صاحباتي البنات ويمكن تكون البنت الوحيده في الشله اللي كانت مراتي - ( ايام ما كانت خطيبتي ) - مبتغرش منها ولا بتضايق قوي لما كنت اتكلم معاها .

اسمها نجلاء وكانت من اطيب الشخصيات اللي ممكن تقابلها في حياتك ؛ مثال حي لجدعنة البنت المصريه الي اهلها عرفوا يربوها كويس .

لسه فاكر يوم ما جت تبارك لنا عالجواز انا ومراتي الي هيا صاحبتها الانتيم؛ كانت خلاص فاضل لها 3 شهور وتتجوز ؛ حتى خطيبها اتصل بيها واحنا قاعدين 4 مرات علشان يطمن عليها .

بعد الكلام ده باقل من اسبوعين فوجئت بمراتي بتقولي :

• نجلاء محجوزه في المستشفى !
• مستشفى ! ليه ؟ عندها ايه؟
• الدكاتره مش عارفين عندها ايه ! وطنط (يعني مامتها ) قالتلي نسبه الهيموجلوبين في الدم منخفضه جدا .

بيني وبينكم الفار لعب في عبي (زي مبيقولو) ؛ بس مرضتش اقلقها وقلت :

• طيب محتاجين دم . ؟
• لا الدكاتره نقلولها دم ؛ ودلوقتي بيعملولها تحاليل .

تاني يوم جت مراتي من الشغل مش عارفه تفتح عنيها من العياط

• مالك يا بنتي. اعوز بالله ؟

ردت بالعافيه

• يا مجدي .... نجلاء عندها لوكيميا !

اهلا بكم !

مش عاوز احكيلكم على المعانه اللي عانتها قبل اما تموت . ولا احساسنا في الكام مره الي رحنالها فيها (المعهد القومي للاورام) . ولا الشيكولاته اللي جبتهالها واللي كانت بتحبها؛ بس الدكاتره منعنها عنها ؛ علشان بترفع لها درجه الحراره ودي فيها خطوره كبيره على حياة مريض السرطان ؛ نجلاء ماتت قبل اما تتجوز ب 3 شهور . ماتت علشان مسرطنين عباد الله يزدادو غنا ...

هي انشاء الله عروسه في الجنه ؛ وهما انشاء الله هتنطبق عليهم الأيه الكريمه ( وويل لهم مما يكسبون )صدق الله العظيم وحسبي الله ونعم الوكيل .

اهلا بكم !!!!

مجدي محمد اسماعيل