|
مساء الفل علي كل شباب الشبكة
العنكبوتية - كل مستخدمي النت يعد شاب حتي لو
تخطي السبعين-
وكل المستخدمين في ارجاء المعمورة . اتقابلنا
الاسبوع الماضي وتحدثنا عن الاضراب الثاني
الذي ذكرت الحكومة بنفسها ان الفضل فيه يعود
لشباب الفيس بوك اللي قالوا عنهم انهم شوية
عيال (وياريتنا كنا لسة عيال ) ما كناش ها
نشيل الهم علي الاقل.
احب اقول لجروب الفيس بوك انكم
لو حبيتوا تعملوا لنفسكم دعاية واعلان وتعرفوا
ناس جديدة بيكم ما كنتم ستجدون افضل من كل
دعايات صحف الحكومة واعلامها لكم.
المهم يا شباب ؛ قبل الاضراب و
بالتحديد يوم 30 ابريل وفي خطبة السيد الرئيس
بمناسبة عيد العمال- ما اعرفش ليه الخطبة يوم
30 مع ان عيد العمال يوم 1 مايو- ما علينا ما
جتش علي دي؛ لقينا رئيس الجمهورية يقول ان
العلاوة لن تكون 15 او 20 ولا حتي 25 لكن 30%
هييييييييييييييييييييييييييييييييييييييييييييييييييييييييييا
وتصفيق حاد من حملة المباخرواشخاص يبدو انهم
ينتمون لشعب اخر غيرنا. ربكم والحق انا ما
استريحتش ,طبعا انا مش مكشوف عني الحجاب ولا
حاجة ؛ لكن هي دي العادة كل سنة بعد العلاوة
بتترفع الاسعار .ده لما كانت العلاوة15% فما
بالكم لو العلاوة 30% اذن هناك مصيبة وقعدت
استناها. طبعا العلاوة مقدارها قد ايه ما
يفرقش الكلام ده معايا خالص ؛ لا مش عشان انا
مش محتاجة لكن عشان انا ما ليش فيه , انا ما
باشتغلش في الحكومة عشان العلاوة هاتفيدني لكن
الزيادة في الاسعار هتتسبب في مشاكل عدة لن
يكون اخرها اني اتنازل عن اكل وجبتين بل
سينحصروا لواحدة.
وهب لقيت الاضراب فشل وبعده
جات العاصفة التي شنها رئيس الوزرا ثم وزير
المالية وبعدها وزير الاستثمار وتوالت الحكومة
بوزرائها واعلامها ومباخرها وزفتها وكل الكلام
اللي انت عارفينو من غير انا ما اتكلم.
في قرار مكون من 63 صفحة
يتناقش في بضعة ساعات ! و المهم ان كل
المعارضة في مجلس الشعب ما يعرفوش حاجة عن
الموضوع واتفاجأوا زينا كده بالمناقشة وانهم
لازم يشتركوا لزوم الحبكة الدرامية.انتو
عارفين اني ممكن اقعد انا وجوزي ما يقرب من 3
ساعات نتناقش في الاكل بتاع بكرة هيكون ايه و
دول كانوا بيسلقوا بيض مش بيناقشوا قرار مهم
ما اصل هما ما يفرقش معاهم خالص اي زيادات دول
بهوات لا لالا دول بشوااااات.
السؤال المهم هو....السيد
الرئيس عايز ايه بالظبط ؟؟؟؟!!!! عايز يقول ان
اعلي ما في خيلكم اركبوه ؛ده لو لقيتوا حمار
تركبوه مش حصان.
اصل نقول الحكومة و قرارها وكل
الكلام ده لايجدي ؛ لأننا ببساطة ولا احنا بلد
ديمقراطي و لا المناقشات بتاعت مجلس الشعب ده
لها اي اهمية بعد قرار الرئيس الذي هو عبارة
عن فرمان من حامي حمي الديار لا رجعة فيه
.الحقيقة انهم جميعا قالوا ان الاضراب الي
بيعمله الشعب كلام فارغ وكل تحرك من المواطن
مجرد زوبعة في فنجان .لذا احنا هنقول اننا
هنزود العلاوة و كده يبقي عدانا العيب ونقوم
مزودين الاسعار و نسيبهم يخلصوا علي بعض وقال
يعني هما ما لهومش فيه خالص. وطبعا احنا شعب
ما لوش لازمة لا هيثور و لا هيعترض لكن كل
واحد يقدر يسرق قوت اخوه هايسرقه وكده الرئيس
يصبح الرجل المثالي الذي اراد انعاش الشعب لكن
الحكومة هي اللي عملت الحاجات الغريبة ده وهو
ما يعرفش حاجة.
الشعب بدأ يشعر نوعا ما بالظلم
الواقع عليه والالام التي يتجرع كأسها ليلا
ونهارا و الحرامية لا زالوا في ازدياد ولكن
عين الله تري والعدالة وان طال امد ظهورها الا
انها ستأتي لا محالة نحتاج فقط قولة (لا) قوية
مدوية لأن يد الظلم طولي ولكنها اضعف بكثير
مما نظن وان كان الظلام الحالك اشتد فانما دل
هذا علي قرب الفجر الذي لن تحتمل نوره كل
الزواحف والتي لن تجد جحور تزحف اليها ووقتها
لن يجدي الا المعروف.
رشا غـــــــــــــــــازي
|
