موقع دوشة "الشباب الحر .. مش هنسكت"

من الاخر كل واحد منكم ضروري سمع جمله او اتنين من اللي فاتوا دول يا اما من ابوه او من امه , سواء كنت ولد او بنت , احنا جيل اللي كل الناس طلعت فينا القطط الفطسانه , لمجرد اننا عندنا رأي و عايزين يتاخد رأينا في ابسط حقوقنا في الحياه اللي احنا مش عارفين ناخد منها اي شئ – الحقيقه ان انا مشفتش حضرتك يا بابا او حضرتك يا ماما لما كنتم في نفس سني – و ما يحاولش حد فيكم يقولي انه كان كلمه امه او ابوه سيف نافد علي رقبته زي ما هم عايزين يوصلوا لنا كده .

اصدق انك ماجادلتش والدك , بس مصدقش انك كنت راضي علي كل تصرفاته .

اصدق انك كنت بتسمعي كلام والدتك , لكن اشك انك كنتي بتنفذي كل حاجه فيه .

علشان ببساطه في اختراع ما حصلش , كل الاباء لا يعترفوا بيه ابدا اسمه اختلاف الاجيال احنا جيل و انت جيل تاني . زي ما كنتم انتم جيل و ابائكم من جيل تاني .

في حاجه تانيه مهمه , ان احنا جيل الثوره الالكترونيه و التقدم العلمي الفظيع و كلام بحق و حقيق , مش كلام جرايد بان معانا العالم بيكون فعلا قريه واحده و صغيره كمان , اقدر اني اعرف اخبار اخر الدنيا ب (click)علي ال (mouse) بساطه جدا

ثم ان احنا جيل مظلوم من الجميع , و مصدوم في احلامه الضايعه لاننا في ضل – بلاش ضل علشان اللي احنا فيه ده شمس اغسطس مش اي ضل و الله .

احنا عايشين من غير احلام لان امالنا كلنا هتنهار فبلاش نحلم من الاصل

احنا الجيل اللي لو الاجل االنهارده قالوا مالناش دعوه بيكم صرفوا حياتكم هنموت من الجوع لاننا لا بنشتغل ولا عندنا مورد رزق و اللي شغال فينا فلوسهرايحه علي المواصلات و خلاص .. و بيشتغل علشان مايشفش نظره شفقه في عين حد او نظره لوم من حد تاني و لسان حاله بيقول يمكن الشغل يجيب شغل لكن قعده البيت هتعمل ايه . ولا الشغل بيجيب شغل ولا الحاله بتتحسن و لا حتي حد سايبنا في حالنا . لمجرد ان احنا بنتكلم و ناخد و ندي في الكلام مع ان ده حق من حقوقنا اللي الدوله سلبته مننا زي ما سلبت حقوق تاني كتير لادعي لذكرها لانها لا تختفي علي حد . و بدلا من ان يكون والدي او والدتي ارفق الناس بي و اكثرهم بنا شفقه و نتكلم و نتجادل – هيستفيدوا من رأينا و الله ... تلاقيهم اول حد بيلومنا . مش الاخير – علشان حاجه صغيره قوي وقعت من حسابتهم و هي انهم كلهم مواليد عصر عبد الناصر .. و عليه قولوا ربنا يكون في عون اصحاب البلاوي اللي هم احنا .....

بقلم : رشا غازي